HUNTHAR

Nunkhaw Sana
Hringnun hohzia zirtîr kher i ngai lo,
Nunna derthâwnzia hrilh kher i ngai hek lo;
Vawiinah rim takin thawk la,
Naktûkah a rah seng lo pawh ni la;
‘Beidawnna’ hi hmun ken kher a ngai lo,
‘Beiseina’ hian i ṭhian nih a châk reng fo.

Tûn hun hi i ta liau liau a ni a,
Hlim tak leh duhawm takin nung la;
Tumruhna nên thawkrim ang che.
Naktûk atân engmah khêk suh –
Chutih hunah chuan Nunkhaw Sana hi
A lo tâwp dêr tawh maithei asin!

 
Thai lawk.
UI LEH AR CHHUAH : Ui leh Ar chhuah hi kan sawi ve chamchi a, DC order pawh a awm, Local Council order pawh a awm, YMA Sanitation Sub-Committee pawhin an ti tawh ṭhin. A vulh ho ten thu kan awih duh tlat lo mai hi chu Pathian ringtu nih hi engemaw a sawtna awm ang le. Dan zawm duh lo tu chuan vanah enge a beisei ve, beisei lo zawk mai se duh leh chhuahin vulh mai mai se, lawmman hmuh in beisei ve lo law law se. Chance nei in siamṭha thei chu kan ni. One day CM kan va ngai em...



 
Hriatzauna :
Damdawi Ruihhlo hi
    Damdawi ruihhlo (Drugs) hi kan taksa tan leh hriselna atan thil tangkai tak a nih rualin hmansual anih chuan thihna hial pawh thlentu a ni fo mai. Hetiang taka damdawi (Drug) hmansualna leh mi ṭhenkhat in sumdawnna atan an hman avangin India sawrkar chuan Narcotic Drugs & Psychotropic Substances Act, 1985 hi a lo duang chhuak ta a ni. Heng dante hian dan lova damdawi zawrh, hralh, kawl leh hmansualte bakah dan lova sumdawngte lo ṭanpuite a khap tlat mai bakah chutiang ti ṭhin chu an thil tihsual azirin thihna thlengin (death penalty) hrem theihna a siam a ni. Dan bawhchhetute chu Chapter IV ND&PS Act in a sawi angin na taka hrem theih an ni.

 
Eng atana duan nge kan nih???
    Pathian hian thil a siam reng rengte hi an awmna hmun tur leh tih tur a ruahman sak ṭheuh va, rul erawh chuan a awmna tur a awm lovin a tih loh tur a ti a, khawvel anchhedawnga siamtu rahbi khatna a nih phah ta. Keini ve hi siamtu hian eng atan nge tuna kan awmna hmunah hian min dah ve ni ang le. Kan awmna hmunah hian tu emaw tak eng emaw tak ni turin min dah a, tuna kan awmdan hi siamtu min duan dan a ni chiah a ngem? Kan buaipui mek hi siamtu min duanchhan a ni dawn em ni? Fiah taka tlai ni tla tur thlir liam thei hauh lo tura duan kan ni bik dawn em ni?? Veng lun laia awrawl tawp chhuaha nunau ti thlabar tura duan tunge awm ang. Buaina a awm apianga hming lang sek tur leh inhnamhnawih ziah tura duan kan ni bik dawn em ni? Siamtu hian eng atan nge min duan? Chu chu ngaihtuah ila, siam kan nihchhan ang tak chuan nun hman i tum ang u.