IN ENNAWN ANG U

    Ka va ngai em nunhlui mual liam hnu te kha, kohkir theih nise aw han kokir in ka lo ngaihsak ṭhat duh loh zirna te, ka khawlai nun uluk loh na zawng zawng te kha tun ah zawng in siam ṭhat nan khua a tlai zo ta. Kum a lo tam tual tual a, a pawi zia ka hre tam tual tual zawng a nih hi. Kan hun lai ti ve khanglang ila, kum 30 hmalam kha chuan kan Sikul kal na te kha a harsa in, ke in hla tak tak kan kal ṭhin a, tun lai ang hian Motor a la tam lo in, ke a khaw hran veng hla tak tak ah kan kal ve ṭhin a, sum leh pai a harsa in a nei fa deuh te tan lo chuan Sikul kal a har ṭhin hle.

    Nu leh pa te feh hlan a nau awm pah a Sikul kal te a ngai a, middle kal thei tur chuan in Shillong ah kal te a ngai a, a nei nung fa tan lo phei chuan harsa tak  a ni. Aw le tunlai a kan zirlai te hi kan ṭhalaite hian eng ngati nge an tih ṭhat duh loh le ka lo ti ve ṭhin a. Mahni khaw tualah, mahni vengah te zirna in a lo awm tawh a, nau awm chung a Sikul kal a ngai tawh lo bawk nen; he ti chung pawh a an zir ṭha duh lo hi eng vang nge ni ang le? Kan chenna khawvel pian ken ve reng em mi ni dawn le? A lehkha zir tam zawk a te lah hi tum mumal pawh nei lem lo in chhungte thuawih nan tiin an zir a, pawlsawm an zir thlen hma in an bansan leh a, a luhlul leh sual tawk chauh in an zir emaw tih pawh awl tak a ni. Zan ah mut na chang an hre lova zingah thawh an tum hek lo, engmah ngaihtuah mang si lo hian nupui pasal te an la innei ve leh ta nghal a, hetiang reng a kan kal chuan kan hmalam hun tur chu sawi pawh a ngam awm loh a ni. Khawimaw lai ah ṭhian te zar ah kan rui ve a, a khila tu aiin kan la pawr leh ta nghal a, kan ṭhat lai kan thawhtheih lai hun hian kan hma khua tur hi kei mahni ngei hian kan relfel a ngai a ni. Zirna  lama kan kal loh pawhin kut themthiamna lamah hma la turin theih tawp in ṭan i la thar ang u. Nitin a in hlawhfa chawp a eizawn ringawt hi chuan Nupui fanau chawm hi a harsa tawh si a. Mahni thawhchhuah ve chhun pawh dah ṭhat nachang hrelo a, khawlai a kan ruih pui hian tu mah kan ti mualpho lo, keimahni tho a ni mualpho chu ni. Khawlai a zurui au thler vak vak ṭhin te hi tuman an ngaihsan ka ring lo. Chuvangin ka ṭhalai pui te tun aṭang hian mite entawn tlak in nun tum ila, kan khawtlang zim te (Hunthar) hi  timawi a, ti hmingṭha tur in ṭan i la thar sauh sauh ang u. Mi te tan a bengchheng leh ninawm nih ai chuan, midang tan a malsawmna nih hi i tum tlang ang u.