HRISELNA

 -Bsa Hnamte

 

   Hriselna emaw mihring hrisel kan tih hian abikin Mizote rilruah hian tehna nghet tak mai kan nei sa deuh ni hian a hriat thin a, a tlangpui in Natna in a tihbuai loh emaw natna avang a buaina nei lo hi a ni tlangpui hian a hriat a. Mizote bik kher lo pawh khawvel hnam hrang hrangte hian hrisel kan tehdan  hi a in ang lo in, kan tehfung pawh a in ang vek kher awm lo e.
   
    Hriselna lam a khawvel pumpui min kaihruai tura pawl lian ber leh rintlak ber World Health Organisation (WHO) in hriselna a hrilhfiah dan hi i lo bihchiang i la, a theih chin chinah tehfung atan

pawh hmang thei i la a tha awm e. World Health Organisation chuan hriselna chu tihian a hrilhfiah a "Taksa, rilru leh khawtlang a harsatna nei lo a ni a, natna in a tlakbuak loh leh a tihbuai loh ringawt hi a ni lo", tiin. W.H.O. hrilhfiahna atang hi chuan mihring hrisel ni tur chuan taksa hrisel neih ringawt a tawk lo va, rilru hrisel leh khawtlang nun hrisel tak kan neih a ngai tihna a ni.

    Taksa hriselna chung chang bik hi chu sawi tam ngai lo in kan  hrethiam vek awm e. Rilru hrisel tak neih  hi a pawimawh khawp mai a, rilru hriselna chungchangah bik hian sawi tur pawh a tam thei awm e. Tunhnai deuh atang khan Mizoramah abikin thalaite zingah tunhma lama kan la hriat ngai vak loh depression nei leh hemi avanga mahni intihlum hial duh ta mai te pawh kan awm ve ta nual mai niin a  lang a. Zoram pum huap ang pawh a kan ngaih pawimawh a, rilru kan sen te pawh a hun ta khawp mai. Mipui nawlpuiin rilru lam doctor Psychiatrist pan thin te kan hmuhdan pawh hi kan thlak a hun ta khawp mai. Rilru lam doctor te hi a pawng a puia pan ngawt tur chu a ni miah lo a, chutihrual chuan heng kan mithiamte thiamna hi chhawr tangkai thiam erawhchu a pawimawh hle thung si a ni. Mizoramah phei chuan rilru lam doctor tha tak tak, kan Thlarau lam nun thleng a rawn tlak kan nei nual hi a va hlu em. Rilru hriselna chungchang ah hian thu tha tak tak an ziah leh anmahni ngeiin an lo tawn hriat atanga an ziah chhuah te pawh chhiar tur tam tak kan nei te hi a va lawmawm leh zel em. Hawh u rilru lam doctor kan hmuh dan leh an enkawlte kan thlir danah hian rilru thar i pu ang u.
   
    Taksa leh rilru hrisel neih ringawt pawh a la tawk chuang lo a, chung hriselna kan neihte chu engtinnge khawtlang tan kan hman tih kan chhut a kan ngaih pawimawh a la tul fo a. Mizo thalaite zingah Kohhran tana mi \angkai tak tak, mahse Kohhran rawngbawlna pawnlam khawtlang thilah (a bikin Y.M.A.) chuan mi\hahnem vak lo te pawh a awm theih awm e. Kohhran huang chhunga rawngbawlna ringawt hi eng emaw chang chuan a tawk zo lo fo va, Kohhran hming a  hmalak remchang lo leh mawi chiah lo a awm ve fo thin si a. Ram leh hnam humhalh kawngah te, khawtlang siam that na kawngah te hian zau zawk a rawngbawlna kan neih theihna kawng awlsam ber chu Y.M.A.-a thahnemngai taka inhman mai hi a ni a, rualkhai taka kan awm tlan theihna pawh a ni awm e. Helai hi Kohhran hrang hrang thalai pawl te pawh kan inenfiahna tur pawimawh tak a ni.

    Mizo thalai taksa leh rilru hrisel tak nei si, mahse mahni awmna veng leh khua tana tha la thawh tlem tak leh la thawh ngai miah lo te pawh a awm theih ve tho awm e. Kan tih theih awm tawkah chuan tlanchhe lo in hmalam i pan zel ang u. Mahni awmna veng leh khuaah buaina siam ching, khawtlang tan a mi hnawksak kan lo nih vaih phei chuan insiamthat vat a ngai a ni. Kan hun kal tawh ah tihsual kan lo nei tawh thin anih pawhin kan hun lo la kal leh turah chuan midanglam nih tumin tan i la sauh sauh ang u.

    Khawvel huap a Medical Science Organisation rintlak tak mai pakhat phei chuan heng a chunga kan sawi tak pathum taksa, rilru leh khawtlang a buaina neih loh ngawt hi hriselna hrillhfiahna atan a duhtawk lo a, hemi piah lamah hian Thlarau nun hrisel tak neih ngei a la tul niin a sawi ve tlat mai. Chumi awmzia chu rilru, taksa, thlarauah kan piangthar ngei tur a ni tihna a ni.