MIZOTE LEH THIANGHLIMNA

-Rosangliana Fanai

    A kotu che u a thianghlim angin nangni pawh in chêt dân zawng zawngah lo thianghlim zâwk rawh u. Kei ka thianghlim si a, nangni pawh in thianghlim tûr a ni. 1 Petera 1:15-16.

Mizote hi kan pi leh pu te hunlai aṭang tawhin thianghlimna lam ngaihthah tak leh a nachang pawh hre lemlo kan ni a, kristianna in min luhchilh a, min chiah hrep hnuah pawh thianghlimna hi kan thil ngaihsak loh pawl tak leh kan thil lakzam leh pawmzam theih tak thil chu a ni ve reng reng a nih hi

maw!

   

    Mithiam ten an sawi dan chuan kan taksa a natna 80% hi keimahni in siamchawp a ni a, a bak 20% te hi chu vanduai vanga kan kai leh vei a ni an ti. Pathian hian duh taka a siam mihringte hi min hmangaih em em a, kan ṭhatna tur in engkim min duhsak a, ṭha taka dam a, hrisel tak leh chak ṭha taka awm tur in min duh a ni. Chuvang chuan a Bible thianghlim ah pawh thianghlimna chungchang hi vawi tamtak a ziak lang nghe nghe a ni. Zuk leh hmuam, ruihhlo leh kan taksa tichhe thei chi tinreng te hian keimahni ah nghawng thalo nasa tak a neih zia leh a pawithui zia pawh kan hre hne hlei hlui tawh a, amah erawh chu sim tum leh fihlim tum chu tlemte chauh kan ni hlawm awm e. Mihring tam dan aṭanga chhutin Mizoram hi khawvel ah zuk leh hmuam avanga Cancer natna vei tamna ber ram a ni a, kan Kristianna nen a inhmeh lo khawp mai. Kan Zoram statistic ah chuan mipa 80%-in zuk leh hmuam an ti a, hmeichhia 60% in zuk leh hmuam an ti tih tarlan a ni. Tuna a thar ber statistic erawh ka hre lem lo, a rapthlak in a zahthlak hle bawk. Heti taka Pathian In kan zah lo hi thil mak tak a ni.

    Heti tak maia Kristian te’n zuk leh hmuam kan ti nasa lutuk hi kan in enchian a ngai khawp mai, kan inkhawm turte hi han in en ila, inkhawm tur e tilo chuan Biakin lam panin kan zu a, kan hmuam a, inkhawm ban vel a zuk tur leh hmuam tur nen kan ipte ah Biakin chhung ah kan in pailut ṭen ṭun a, Biakin chhung ah kan zuk leh hmuam tur han ah luh te chu kan pawiti  tawh lemlo a nih hi maw! Tunah zet chuan kan zuk leh hmuam tih te chu rualpawl nan te, ṭhian inkawm hlim nan te kan hmanga, kan nuna bet tlat thil langsar tak pakhat a nih tak ber hi mo!

    Mizoram Kristian ram nisi hi kawvelah vaihlo leh a kaihhnawih hmang tamna ber a ni tih Global Tobacco Survey report in a tarlang a, nitin zuk leh hmuam manah cheng nuai 60 sing 9 vel kan sengral ṭhin a, hei hi kumkhat ah cheng vaibelchhe 219 leh nuai 34 bawr vel ni a chhût a ni. Pathian hniakhnung zuitute tih atan chuan thil mawilo tak a va ni tehlul em! Khawvel ah a percent a chhut a Kristian tam berna ni bawk si, heti tak maia thianghlimna kan ngaihthah leh si hi thil mak tak chu a va ni em.

Awle, kan Bible chuan thianghlimna chungchâng hi a ngaipawimawh em em a, vawi tam tak a sawi lang nghe nghe a ni. “In thianghlim tur a ni, Kei ka thianghlim si a” tih te, ‘Fai hi Pathian an teuh na ber a ni’ tih te, “In taksa chu Krista pengte a ni tih in hre lo em ni” tih te, “In taksa chu in chhûnga awm Pathian hnen aṭanga in hmuh, Thlarau Thianghlim In a ni tih in hre lo vem ni, mahni ta pawh in ni lova, mana lei in ni tawh asin, chuvangin in taksaah chuan Pathian chawimawi rawh u” tih te leh adang pawh a la sawi tam mai. Pathian hian duh taka a siam mihring te hi kan taksa hmanga amah chawimawi ve tur hian min duh a, thianghlimna kawnga kan taksa vawng ṭha tlat turin min phut tlat bawk a ni.

    Kristian ram, Pathian zawnchhuah ram in ti si hian, kan taksa hi Pathian In a ni tih hre chang lek lovin thil ṭhalo tinreng leh suahsual rawngbawl nan te kan hmang ṭhin a, zuk leh hmuam mai bak ah rukruk nan te, mipat hmeichhiat hman khawloh nan te, drug addic nan te leh sual rawngbawl na chi tinreng in kan taksa hi kan ti khat zo ta a nih hi maw! Kan taksa hi bawlhhlawh chi tinrengin kan bawm khah tir lûk a, Lal Isua aiin hmun a chang tam zawk ang tih theih mai tur a ni. Pathian In, kan taksa chu meikhu ten kan ur nileng ṭhak ṭhak a, chu mai a nilo; zu leh sa leh nawmchen nan kan hmang a, chu pawh kan tan a ṭhatna tur awm miah lo lehnghal! min vaw chhetu leh natna min siam a, kan sum leh pai nasa taka min khawhral tir tu; chumai bakah, a natna hrin chhuah tih dam na tura sum tam tak min paih tir leh tu ni bawk hi kan bansan a, kan taksa aṭanga kan thin thlak ngam a hun tawh khawp mai. Bible chuan a lo thlawn mai maia sum khawhral te hi a phal miah lo a nia...

    Mizo te kan inngaihtuah chian a hun tawh khawp mai, Krista kan rinna hi ka ringawt a ring ni lovin, kan rin na pawh hi thil tih a kan tihlan a ngai ve bawk. Bible vekin ‘Rinna chu thiltih tello chuan thi a ni’ a lo ti bawk. Thiltih avanga Van kai tum lam ni lovin, Kristan min tlanna a zara Ama ta kan nih tawh avang zawka Ama tâna nung tur kan nih tawh zawk avangin. Bible vekin ‘Mihring chu kan ṭhatna ber pawh puanchhe hnangkhai a ni’ a ti. Mahse, puanchhe hnangkhai taksa, kan theihtawka Krista tâna kan lo  inserh hran vena kha, min tlanna a zarah pawmsak kan ni chauh dawn a lo ni. Mitin mai hian duhthlanna thiang tak kan nei vek a, i thuin thiam i chang ang a, i thu vekin thiam loh i chang ang tih a nih kha. Heng kan sawi kan taksa min tichhetu leh min tithianghlim lotu, zuk leh hmuam, zu, ruih theih thil chi tinreng kan taksaa rorel mektu paih bo pawh hi kan thu thu a ni. Mizote hi biak ina kal nasa, inkhawm taima tak kan ni. Mahse, zuk leh hmuam avanga cancer tamna ram, HIV/AIDS hluarna ram, a ram tet ang hua ruihhlo hluarna ram kan ni hi kan kristianna nen a inhmeh lo thlawt a ni. Hawh u, heng min tihrisel lotu, min tibal a, kan nun titawitu, min tithianghlim thei lotu hi kan nun aṭanga um bo ṭheuh turin ṭan i la ang u. Chu chu kan Pathian duh dan pawh a ni a, Kristiante tih atana thil mawi tak pawh a ni reng a ni.