I hre thar ang u

I hre thar ang u

Kan ram hian chhiatna rapthlak tak kan la tawk lo hle a, a lawmawmin kan vannei hle a ni. Amaherawhchu, mithiam ten an sawi angin kan hma lawkah hian chhiat rupna thleng mai thei dinhmunah kan ding a ni tih kan inchhut nawn a tul hle a, Eng chhiat rupna nge kan tawh dawn tih erawh chu kan sawi lawk thei lo nain, hetiang chhiat rupna hi kawng hrang hrangin kan tawk thei a ni.
Lirnghing
Kan ram hi lirnghing kalkawng a ni an ti thin a, chuvang chuan he lama inzirtirna pawh hi tun aia kan inpek tam a tul hle a ni. Mizoram sawrkar chuan lirnghing lo thleng thut laka mipuite hamhaih lutuk lova inven dan inzirtirna hun an hmang a, hmanni lawkah pawh Mock Drill an buatsaih hial a nih kha.
Mipui pawhin lirnghing lo thleng thut laka inven dan hrang hrang an hriat theih nana mahni inzir a, midang zawh peih te pawh a ngai dawn niin a lang a ni.Chuti a nih loh chuan lirnghing rapthlak tak lo thleng sela mipui hian a lo dawnsawn dan kan thiam lovang tih a hlauhawm a ni.
Leimin
Kan ram leilung hi a la naupan avangin lei a nghet lova, lei a min deuh reng a, rapthlak khawpa min erawh chu Lawngtlaiah leh Hlimenah deuh chiah khan a la thleng a, kha tah khan mi eng emawzat an thi a, hliam eng emawzat an awm bawk a nih kha. Khami tum khan mipui lamin hetiang chhiatna lo thlen thut pawha inven dan kan la zir loh avangin an chiai hle a, chhanchhuah hna pawh duh angin an thawk thei lo-va, mipui kha an inchimbuai nasa hle a ni. Hemi kawngah hian inzirtirna inpek a tul khawp mai.
Thlipui
Kan chhehvelah hian thli kawng a tam hle a, Bangladesh lam han thlir ila, thli tleh a awm deuh reng a, a siper pawh Mizoramah chuan na tak a tling a, engtikah emaw chuan nasa lutuk hian a tleh lovang tih a sawi theih loh. Kum 1982 leh 1996-a Mizorama thlipui tleh avang khan in leh lo chan an tam hle a, thlipui tleh laia inchhunga awm dan tur te leh a lo dawnsawn dan tur kan hriat mumal loh avangin nasa takin kan tuar a, tunhai maiah Aizawl khawpuiah nasa lutukin a han tleh leh a, mipui an chiai a ni. Chuvang chuan hemi kawngah pawh hian inzirtirna tha kan mamawh takzet a ni tih i hre nawn ang u.
Aw le, heng zawng zawng hi lo thleng mai thei a nih avangin sorkar-in a tih tur a ti anga, mipui lamin kan tih tur \heuh taima takin ti ila, chhiatrupna thleng thei lakah hian kan him ngeiin a rinawm.