Tun hnaia kan vengin harsatna lain tak kan tawh chu rukruk hmang te an zalenta hi a ni awm e. Tun thla leh thla hmasa chhung ngawt pawh khan dawr rawk, inchhunga mi Gas bur ruk chhuah leh thil bo hrang hrang sawi a tam hle a ni. Heng thil rutu te hi ka hriat sual loh chuan man mumal pawh an la awm lo a ni. Tin, han rinhlel tur takngial pawh hre lova kan thil a bo ta fo mai hi a zia lo hle a ni. He thil hian kan veng boruak a tinuamlo hle a, nun a ti ralti hle niin a lang. Man chhuah an nih loh avangin vawin thleng hian huangtau takin an la che zel a ni ber mai; khawtlang mipui kan tanrual loh chuan heng thil hi kan ti reh mai dawn lo niin a lang.
Vanneihthlak takin Hunthar Siamtha Pawl ten theihtawpin hma an la a, zan rei tak thleng han duty pawh an nei zauh zauh bawk. An ni hi member tam an nihloh avangin veng mipui ten kan tawiawm tha lo a nih chuan an hmalakna ringawt hi chu a tawk lo fo tih i hre thar ang u. Tin, Gas bur te hi an ruk hian a tlangpuiin a rang thei ang ber a hralh hi an tihdan a ni a, veng mipui ten mi hralh ruk lo leisak ching te hi kan awm em tih te hi inenfiah chu a tul khawp mai. Hetiang veng reng ruangah rukru pahnih khat zalen taka kan chet tir fo hi a tha lo hle a, man chhuaka tireh ngei turin tan lak a tul tak meuh meuh a ni.
Veng nuam tihna hi in leh lo ropui leh mawiah a innghat ber lo fo a, thlamuang leh hlim taka chen ho dial dial theihna veng hi veng nuam a ni chawk. Tun anga kan kal zel a nih chuan he veng hi veng hrehawm tak a ni mai dawn a ni. Tu kutah mah innghat ngawt bik lovin veng nuam leh boruak muanawm tak ni turin a chhunga chengte hian tan ila thar sauh sauh ang u.
0 comments:
Post a Comment