Pathianin he leiah hian chhan neiin min siam a, lo pianga, seilian a thihni nghak leh ngawt tur chuan tumah hi a siam a rinawm loh hle. Kan mawl emaw kan fing emaw keimahni phak tâwk ṭheuhah mawhphurhna hlen tur nei ṭheuh kan ni. Mawhphurhna leh tih tur nei reng reng lo mihring chu hrin man awm lo, khawvel êng hi lo hmu lo zawk se a tan leh midang tan pawh a ṭha hial zawk ta ve ang.
Chungkua, khawtlang leh kohhranah mawhphurhna hrang hrang neiin kan awm hlawm a, kan mawhphurhna hi eng angin nge kan hlen thin tih hi tun tuma sawi kan tum zawk tak chu a ni. Mi ṭhenkhat chu chanvo leh nihna an chelh ve duah a, a eng a mah tih ṭhat nei lovin kan awm fo thin. Hetiang mi hian chhungkua, khawtlang leh kohhran an ti thuanawp fo thin. Chhungkaw tana thawk ve tur kan nih laia chhungkaw tana hnawksak mai nih te, kohhran member ni ve si inkhawm leh kohhran thil tih ngaipawimawh hauh si lo te, YMA member ni ve tho si YMA thil tih ngaihsak miah lo nih te hi zah nachang hriat a hun ta hle. Mawhphurhna kan la peih lo a nih chuan member nih loh ngam mai te hi a huaisen thlak phian zawk awm a sin.
Thahnemngai taka mawhphurhna hlen hram hram ṭhin te avang hian Chhungkua, khawtlang leh kohhran pawh mualpho lutuk lovin a la kal thei ni te hian a lang ṭhin. Eng pawlah pawh member kan nih chuan mawhphurhna kan kova tla eng emaw tal chu a awm ngei ngei ṭhin a, midang tih ngawt lo ral thlir kan ṭhathnemna hmun a piangah pawl a chak lo mai thin. Mahni din hmun ṭheuh in bih chiang ila, pawl tichak lo tu nge tinung ṭhin tu ka nih tih te hi i in zawt nawn thin ang u. Mawhphurna kan neih chu a sang emaw a hniam emaw keimahni zawn ṭheuhah tihlawhtling turin ṭan la thar sauh sauh teh ang u khai.
0 comments:
Post a Comment