Tualchhung

Lusun

Ni 6/8/2012 (Thawhṭanni) chawhnu dar 2:30  khan Pu Ngurchhuana, h/o Lalrithangi. K-43, (K.Sec) chu Pumna avangin a boral a. Lumen pui niin a tukah Hunthar thlanmual ah vui liam a ni. 

DAM TAKIN RAWN CHHUAK

Br. Fin. Secy, Pu Zabiakthara pawh Internal Bleeding vanga Civil Hospital-a awm chu dam takin Thawhlehni khan a lo chhuak leh ta.

Fimkhur ngai

Tunlai hian kan veng chhung hmun engemaw zatah ruk rukna a thleng a. Dawr rawk, mi in a luh ruk leh Gas bur bo a awm nual. Heng kawngah hian vengchhung mipuite fimkhur turin kan inngen a, rukrute hi man chhuah ngei an nih theihna turin kan mitte len ngun tlang ila a ṭha awm e.

Kawng Khuar

Pu C.Ngunchunga, V.Sec kawmchhak kawngpui hi PHE Pipe phumna laih a nih avangin tun thlengin ala khuar reng a. He kawngpui lai chattute hian a rang lamin hnawh nise a lawmawm hle ang. Motor- a kal leh ke a kal tan pawh accident tawh theihna a nih avangin hnawh thuai turin kan inngen a ni.

Hnawm Hnawk

Tun hnai ruahsur nasa khan hnawmhnawk tam tham tak Pu K.Lalrinmawia dawr chhak National Highway kawngpui ah a rawn chhawp thla hnuk mai a. He bawlhhlawh hi sa sahna bul kawr aṭanga rawn kal thla zel niin a lang. Khawtlang hmel a tih mawi loh avangin heng hi a thlen tawh loh nan hmalak theih ni se a lawmawm hle ang.

Lawmthu

Pu Lalchungnunga, K.Sec chuan Thlanmual In Electric Connection Wire Coil khat a pe. Hunthar Branch YMA- te an lawm hle. 

Damlo

Pu K.Lalhmingliana T.Sec chu Cancer avangin a damlo a, In lamah enkawl mek a ni.