HUNTHAR CONSUMER BRANCH TIH CHAK A TUL

HUNTHAR CONSUMER BRANCH TIH CHAK A TUL

 - Mama Pu

Inverter ṭhalo lei tir vangin `800/- chawi tir, Seventh Day Adventist Kohhran, Sialsuk chuan 2010 khan ab Biak In-a hman tur M/s Electric House, Dawrpui aṭanga Inverter thar an lei chu a chhiat avangin an khing a, Dawr neitute hian `8000/- an chawi. Handset ṭhalo Spartech Mall, Dawrpui South aṭanga an hralh, a leitu Lalrindika Tuikual South in a khin avangin `5000/- dawr neitu ten an chawi bawk a. Tin, NANO Car siamṭhatsak loh vangin National Business Enterprises, Khatla te chuan a khingtu Dr.Aichhunga Champhai hnenah 5000/- an chawi bawk a ni. (Source- Consumer Chhantu).
    Mi zawng zawng hi Consumer kan ni vek mai a. Mahse, kan dikna leh chanvo kan hriat tawk loh avang hian namnul kan ni leh ṭhin a, engemaw tak hi chu kan hlohin kan chan ṭhin a ni tih hi a lang reng mai. A chunga tarlan te pawh khian an dikna leh chanvo an humhalh ṭha hle a, an fakawm hle a ni. Dawr neitu te laka Unfair Trade Practice Act in min humhalhna an tilang ngam a ni. Mithiam ten, “Dan hriat loh hi zahzel a tling lo” an lo ti ve bawk si a. Dan kan hriat loh avang hian kan him dawn chuanglo tihna a nih chu. Kan lungawi lohna te hi ngawih bo pui lovin, tih lan zel a, a ṭul phei chuan Consumer Forum ah te theln zel chin hi a ṭha hle.
    Ho mai mai anga lang, entirnan- Printed Price aia sanga thil hralh te, buk tling lova thil hralh te, Gas emaw Retailer pawh nise DAN kalh vek a ni. Sumdawng ten an advertisment nen- a inmil lo a thil an tih chuan khin theih a ni a. Dawrkai te hian minlo ngaihsakin minlo bengkhawn tur a ni a. An dawr a kan thil zawh reng reng kha kan hriat duh angte min hrilh kha an bat a ni. Damdawi zuarte pawn damdawi thi min lei tir tur a ni lova. Doctor te pawn damdawi thi in min enkawl tur a ni lo bawk a ni. Alu zuartute pawn an alu zawrh lai kha a lian lian thlan an phallo ngawt thei lo a ni. Consumer kan nihna anga kan chanvo hrang hrang te hi kan hriat loh mai bakah, kan theihnghilh ṭhen leh ṭhin bawk si a. Ho mai mai anga lang hi kan ngaihthah fo chuan siam ṭhat leh harsa tak a ni. Heng thil chi hrang hrang hi kan hriat tur a nih bakah Consumer Protection Act, 1986 in kan dik na min humhalhsak na vek a ni. Heng bakah Weight & Measure Act te, Essential Commodities Act te ṭangkaina hriat hi a pawimawh hle a ni.
    Mizoram Consumers’ Union hi 1995 a din tawh kha niin, chumi hma pawn Mizoram Telephone Subscribers’ Union te, Mizoram Consumers’ Electric Association te, Mizoram Gas Consumers’ Union te leh Cable TV Subscribers’ Union te din alo ni fur tawh a. Heng pawl hrang hrang te hian an mahni zawnah consumer te dikna leh chanvo te humhalhin hma anlo nasa em em ṭhin a. A ṭul angin Sawrkawrah pawh rawtna chi hrang hrang an thlen ṭhin a ni. A hrang ahraia pawl hrang hrang hmalak ai chuan tiin pawl khatah inhlawm khawmin Mizoram Consumers’ Union hi alo ding ta ni.
    Mizoram Consumers’ Union Gen. Hqrs hnuaiah Hunthar Branch hi recognised a ni a. A din kum leh a ṭobul tak chu hre fumfe lo mah ila, Branch chak tak zawng a nilo deuh tih a hriat theih mai awm e. Veng ṭhenkhatah leh khaw ṭhenkhatah hi chuan Consumers’ Union te hi an chak em em a, a mimir tan an chhen fakawm ṭhin hle a ni. A nihna takah chuan Consumers’ Union te hi Voluntary organisation a ni a, hlawk duh ringawt a thil ti duh tan a sawt vak awm love. Amaherawhchu, kei mahni mimal ṭheuh tan thil ṭangkai tak a ni lawi si a, kan chanvo min humhalhsak thei tu an nih bakah kan zualko na turte an nih ve tlat na lai hi a ṭangkaina lai tak chu a ni. Kan Local Council lam te pawh hian han phurpui thei se, vantlang inkhawm te ko in, in thlan ṭhat te hi han huaihawt pui thei selang chuan a hlawk ngawt hian ka ring. Consumer lama ṭhanharhna (awareness) chak taka kal ṭhin hi veng hian kan tawn hriat ve ngei a ṭul hle a ni.