Dawn Tisei

“Vengchhung Aw” lamah thahnemngaihna aw ni fahmiang,  kan NGO te thawh hina thatloh thu sawi a awm ta zauh zauh mai. He thil hi tak tak a nih chuan he khawtlang hian hma a sawn chak thei lovang tih a rinawm. Kar kalak a zawh hma ngai hian hetiang boruak awm hi siamthat thuai a ngai a ni. He khawtlanga NGO hrang hrangte hi a din chhan chu he khawtlang tan vek a ni, chutihrual chuan eng emaw avangin khawtlang tana thawk theuh theuh pawh inhmuhmawh a awm thei ve tho mai. Mihring kan nih avangin hetiang thil hi a lo thleng palh anih pawhin a siamtha theitu pawh midang ni lovin keimahni chauh kan ni. He khawtlang a kan hruaitu ber Local Council lam pawh hian a thuikhawm hna an thawh a tul. Pawl hrang hrang awm ve ta chu ngaihdan hrang chu a awm ve tur chu a ni. Hetiang thil a lo thlen palh a nih chuan inrel mai lova dawhkan khat kila sawitlan thin te hi buaina chihfel dan tha tak pakhat a ni. Tin, pawl hrang hrang hian he khawtlang tana kan thawhna kawngah inpawh tlan deuh deuh kan mamawh. Pawl dang ngaihdan tur ngaihtuah map lova thuvuakthlak chin fo te hian innghirnghona chawk chhuaktu a ni duh hle bawk. He khawtlanga kan hruaitu lu ber kan Local Council lam hian pawl hrang hrangte kohkhawm zaite hi relthei se kan inpawhna a tha sawt thei ang em? Nge, mahni kal kal hian kal ila kan thatpui zawk ang le? he ngaihdan hi chu a chhiartute chhan atan dah ila. Kan han sawi tum ber chu he khawtlang hmangaiha, tha leh tui, Sum leh pai pawh lo seng thin pawl hrang hrangte hian lungrual leh inngaih taka ke kan pen ho phawt chuan khawtlang nuam leh hmasawn kan siam thei ngei in a rinawm tih hi a ni.