KHAWHAR IN RIAH

Kan khawhar neih hnuhnung bera K.Sec Leader thusawi kha han tuihnih ve leh ṭulin ka hria. He thu hi Branch YMA Committee pawhin a lo chai hial tawh a ni. Hmun ṭhenkhatah pawh kan veng ang tho a khawhar riak tur awm lohna a awm ve niin a lang. Branch Committee chuan helam kawngah hian inzirtir thar leh deuh ṭulin a hria a, kan ṭan lakna tur tlem han sawi ila a tha âwm e. Kan veng sûk thlêk han thlir leh nu leh pa tam zawk han kawm nikhua hian, khawhar in riah bansan mai hi chu kan la ui tlang deuh niin a lang. Khawhar chhungkua pawh riak tur an awm loh chuan an la hawihai deuh tlat bawk. Chutiang chu kan din hmun a la nih si chuan tlangval tlawmngaite’n khawhar in riah hi kan uar thar leh sauh sauh chu a la ṭul a ni. A awl zawnga han thlir phei chuan tlangval hei zozai hi kan
vengah hian kan awm ve a, a zawna kan thi mawlh mawlh a nih lêm loh chuan in-a leng lo khawp riak reng thei âwm chu kan ni. YMA hruaitute’n nang chu lo tlawngai la, tun ṭum chu riak lo rih mai ta che inti hial tham kan awm. Heng kawngah hian nu leh pate hian kan fapa tlangvalte kan zirtir ngai tawh lo em ni ang aw tih tur a ni. Kan hnathawhte’n a zir loh thu te hi han chhuanlam bawk mah ila, kan tum tak tak chuan zan hnih thum na na na hi chu kan riak theiin a rinawm. Kan Zonun mawi tak kan la chhawm nun theihna remchang a nih hre thar zel ila, mitthi an awm a pianga kan riak thei lo a nih pawhin kum khatah vawi khat na reng reng chu ka riak ve dawn a ni tih rilru hi pu ta hlawm ila kan harsatna hi a kiang ngei ang. Khawhar chhungte tana thlamuanpui tlak erawh nih tum hram hram ila, khawharte tana phurrit kan nih palhte hi thih hlauhin hlau thung ta bawk i la. Kan rilru he lam kawnga lo muthlu reng tawh chu kai tho lehin midang tana malsawmna far khat tal ni turin Mizo tlangval i che chhuak leh teh ang u khai.