LIBRARY BUILDING SAK ZAWH A NI THUAI DAWN

LIBRARY BUILDING SAK ZAWH A NI THUAI DAWN

Hunthar Branch YMA- in tlumtea thlir taka kan lo thlir Library Building sak hna chu zawh thuai tum a ni. Sum lampang indaih lohna avangin hun reitak chawlh lailawk a nih hnu in ni 19.3.2012 aṭang khan hna chhunzawm leh a ni a, tunah hian a building sak ngau ngau phei chu peihfel a ni tawh. Tui lakluhna te, electric wiring hna hautak tak pawh thawh zawh a ni tawh bawk. Electric connection pawh tihfel vek a ni tawh a, tunah hi chuan a hrui thlunzawm mai chauh hmabak a ni. Hetih lai hian kawngkapui chungah saza siam tur a tih a nih leh avangin chu chauh chuan building hawnna a dil tawh a ni. He building sakah hian mimal ṭhahnemngai leh inpe tak takte tamtak an awm a; Tin, YMA member-te pawhin tha ṭhahnem tak an thawh bawk. Hengte avang chauh a hetiang hi thleng thei kan ni. Tunthla chhung ngei hian hawn hman tur a ruahman a ni a, harsatna lian tham a awm loh chuan hawn hman a nih ngei pawh beisei ila. Kan khawtlang hmel timawitu tur leh hmasawnna rahbi min siamsaktu ni ngei se a lawmawm hle ang. Ngaihtuahna, tha leh tui sengtu Branch hruaitute an fakawm hle a. Library thar kan neih hunah chuan tun âi a lehkhabu hawhtu pawh kan pun ngei beisei ila, mumal leh felfai zawkin Library pawh enkawl a nih theih a rinawm. Aizawl khawpui chhungah hian Library Building neilo engemawzat an la awm niin a lang a, a nei tlêmte zingah kan Branch hi kan tel ve dawn ta a ni. Kan duhthusam ang diak diak a thil kal lo, a sak chhung hian a awm pawh a ni mai thei e, mahse chutiang thilte chu theihnghilhin hun lo la awm tur a hmasawn deuh deuh turin i inbuatsaih ang u. A chhiat a ṭhatah a mawhphurtu ṭheuh kan ni dawn a, kan mawhphurhna hlen turin vengchhung mipuite kan insawm tak meuh a ni.