Dawn Tisei

Tun lai hian fa neih tam a pawimawh thu tlangaupui a ni leh tan ta mek a, chhiarpui hnuhnung ber kan thlir chuan kan rama hnam chekhnawk zawk ni a lang te nasa taka an pun laiin keini Mizo bik te kan punna a tlem hle. Hei hian ngaihtuah a ti thui viau mai a, eng vanga fa neih tam hi hlau ta nge kan nih tih hi ngaihtuah ngun ngai ta chu a ni. Hetiang zela kan kal chuan kan hnam hi a him lo tih hi kan ngaihtuah thlen ngam a tul hle. Kan punna rate aia kan kiamna tam kum pawh a awm ta hial mai. India sawrkar chuan Family Planning chak takin a kalpui mek reng a, he policy hi kan ram mihring thawlna Kilometer khata mi 45 vel chauh chenna angah hi chuan zawm ve diak diak hi a remchang lo tih hi pawm a tul. Fanau malsawmna hi kan duh thu a neia nei lo thei kan ni lo va, a petu Pathian hian kan chawm theih tawk tur chu a hria ang tih te hi pawm theih a ngai a ni. Nu leh pa kan nep luat vanga fanau pawh nei mumal ngam lo kan nih leh lek phei chuan ngun leh zuala kan in ngaihtuah a hun hle a ni. Fa nei tlem apiang hi chhungkaw changkang leh hlim an ni hauh lo mai ni lovin chhungkaw rual awhawm tak tak sawi tur hi an thahnem zawk hial em aw tih tur  a ni. Khawvel huap leh kan Zoram khawvel mai pawh hi han thlir ila, mi ropui leh chhuanawm kan tih zingah hian fapa mal fanu mal aiin unau rual tak atanga rawn chawr chhuak an thahnem hle a ni. Kan chhehvela hnam chekhnawk te an pun zel si chuan kan ram kan luah sen loh te hi min la rawn luah khalh lovang tih hi sawi ngam har tak a ni. Inner Line Permit hmang ringawta kan inven theih loh hun hi ala thleng thei tih hi kan hriat a tul hle bawk. Tun atang hian nula leh tlangval nupui pasal la nei tur zawng zawng pawhin ngaihtuahna helam kawngah hian seng thar leh ila, fa tlemte neih hi kan ram leh hnam tan hian a him reng dawn lo tih hi i hre nawn leh teh ang u.