I SIAMTHAR LEH ANG U

I SIAMTHAR LEH ANG U

- Maliana

    Han thlir teh um kan khawtlang hi a mawi mange. Siamtu min hmangaihna hi a va ṭha em! Malsawmna kan dawn hi engtin nge kan rulh dawn le? Kan veng ‘Hunthar’ siamṭha tur hian ‘kei heta hi ka awm e’ ti thei kan awm hi  a va hlu in a va ropui em. Tu dang kan ngaih biklohna kan veng Hunthar hi zaleng zawngte lungruala kan len na, Aw kan veng hi tudang kan ngaihloh lai hian nakin lawkah tlawmngaia thlan lai tur te, khawhar in riak tur te kan inhmuzo lo mai palh ang tih erawh a hlauhawm ka ti khawp mai.

    A chhan chu hei hi a ni; Kan ṭhalaite khawsak dan leh an nunphung ka han thlir hian khawimaw lai
thim chin kawtlai ah te, ka theih tak emaw ti a kan au thler duai duai mai hi pawi ka ti a, a neinung fate tih ang leh awmdan, an khawsak dan kan entawn mahni dinhmun hrechang miah lovin a neinung ber thawkin kan thaw a, keimahni kan inhmuh ai hian kan ṭhenawm khawvengte hian kan nihna an hrechiangin mi nuih tiza mai kan lo ni lo maw? Khawlai ah kan nihna pel rawkin kan han inthing parh vel a, hei hi chuan thlakhat ah engzat tak lalut ang maw? tih tur khawpin kan nalh a, mahse in kan han thlen chuan BPL buhfai leh maian bai bak engmah kan nei leh ngai silo. Mahni dinhmun mila khawsak thiam hi a lo har a ni ange. Mahni engmah ni silo hian ṭhiante zarah kan kamnam ve a, a neiber leh huaiber niawm takin kan han au thler kual vel a, min lo hrechiang tute tan chuan an nuih tiza mai kan ni ṭhin a, zana kan thawven ang hian awm thei ila, zing buhfai thlak tur puk tur zawngin kan fehchhuak lo tur a le!

    Tunlai tê hian kan rawlthar rual hi hi eng kan ti zo ta nge ni, a hmei a pa in ruih tur zawng reng rengin an phili a, hei hi em ni dawn kan khawtlang hmasawnna? Hei hi em ni changkanna kan tih chu le? Hmalam hun ngaihtuahna nei miah lovin ka sapa tal ṭhin a, ṭhalaite khawvel alawm kan ti a, a dik e. Mahse ṭhalaite khawvel an tih chhan chu hetiang ruihtheih thila intlansiak lam a ni lo. Hnathawk tur ṭhalaite hi kan nu leh pate aia remhria kan nih ang ngeiin an thawh ai a thawh hi a ni an tum zawk chu. Ram hruaitu nih te, hna liantham thawh te a ni a kawh zawk ni. Khawlaia zurui chunga au vak vak emaw, zing thawh nachang hriat loh a, a tui ṭha ṭha eizawh lam a kawk lo. Tuna kan veng zimtea kan ṭhalai ho te hian hmasawn an tum dan leh rual an pawl tum dan ka han hmun hian an hmalam hun tur chu zungawi vei bak engmah an nei lo. Phengphe khua a tlai hma ngei hian kan insiamṭhat vat loh chuan inchhir in a sawt tawh ngai lo. Kan inchhir kumkhua tawh mai a ni.

    Nupui fanau pawh han nei ve ṭhin mah ila, BPL tur an pung ting a ni mai. Kan tu leh fa te hetianga rethei tur hian tumah in fa kan neih duh hi ka ring ngai lo. Vanduai vang hrim hrima retheih hi chu a awm a, mahse a tam zawk hi chu keimahni zirloh vang a ni tlangpui. Tuna kan rawlthar te pawh hian ngain takin han inngaihtuah nawn leh ta se, an hmalam hun tur te nen lamin mi an an tum loh chuan engtikah mah an dingchhuak ngai lovang. Kan veng pawh a lo ṭhang chho ve zel anga, a mi chengte pawh kan pung chho ve zel dawn a, mahse kan innghahna ber kan ṭhalai te hian an zir loh chuan reilote an BPL tamna veng kan la ni mai ang. Khawpui chhunga awm ve si hian mi rethei veng kan nih hma ngei hian hawh u ṭhahharh a, kan veng zimte hi mite entawn tlakah kan ṭhalaite hian kan siam thei a ni. Tuman min rawn ti hmasawnin min ti changkang lovang, keimahni ngeiin kan nunhluite kalsan in changkan lam pan tumin ke i pen ang u.