Dawn Tisei

Beiseina nung nei tura inzirtirna khawvelah hian tungchhova kalte chuan beiseina kan nei zêl a, chu kan beiseina chuan kan nun pawh nasa takin a ti danglam thei ṭhin a ni. Mihringte kan khawsak ho na-ah pawh kan chenpuite, kan chhungte, kan nu leh pa leh kan unaute, kan ṭhenawm khawveng te chungah ngei pawh beisei kan nei ṭhin. Kan beisei anga awmlo leh beisei phalo lutuk te chu kan lakah an tlatlum thei ngailo a nih hi. Mahse a beiseitu te pawh hian a chintâwk kan hriat a ṭha khawp mai. Khawtlang anga kan inenkawlna ah leh kan thawh hona ah pawh hian hei hi kan hriatreng fo a pawimawh hle a ni. A bik takin kan vengchhung bik han sawi ta ila, YMA, Local council te leh tlawmngai pawl dang te pawh i chunga thil ṭha ti tur hian engchin hi nge thawk se i tih le? I inbul  huan leh Vantlang kawngte fai taka enkawl reng turin i beisei em? In chhungkaw buaina emaw, I inbula zurui hawklak bengchheng siamte rawn khap dai zung zung tur ten i beisei ṭhin em? Heng kan sawi tak te hi chu chhungkaw tin ten mahni a kan tih theih vek a ni a, kan in leh a vel te hnatlanga tih fai kan beisei reng a nih chuan kan in enfiah hle a ngai ang. Kan inbula buaina leh bengchheng siam ṭhinte pawh YMA leh Siamtha pawl te chinfel tura dah zel ṭhin kan ni anih chuan insiamṭhat deuh kan ngai tih na a ni. Pawl anga hmalakna chi leh a hu ho a thawh chi chu a awm nameuh mai; Tuna kan in beisei danah erawh hi chuan thlak danglam deuh ngai chu a awm niin a lang. Kan beisei anga an awm loh chuan in sawiselna leh in hmuh thiamlohna te a thleng fo ṭhin si a. A chintawk kan hriat tlan a ṭul tak zet a ni.