Pathianin mihringte hi chhan nei vekin min siam a; mahse, dam chhan nei pawha inhre lo leh kan dam chhan tura Pathianin min tuk hre lo va, mahni duh zâwng zâwng hawia nung mihring hi kan ṭhahnem viau âwm a sin. Sum leh pâi, in leh lo, thiamna leh hmingthannate hi a hlu vek mai; mahse, kan dam chhan tura min siamtu remruat chu he mi piah lam thil hi a la ni cheu si. Kan Bible chuan mihring dam chen tur a sawi chu kum sawmsarih emaw kum sawmriat emaw vel chauh niin a sawi a. A rei loh tehlul nen, hemi thleng pha lova boral ta pawh an ṭhahnem viau bawk; a reina chu thawhrimna leh lungngaihna mai tiin tlâng min la kawmsak a ni.
Sum leh pâi hi a hlu a, a tel lo chuan kan khawsa thei lo. Mahse, sum leh pâi leh hausakna te hi dam chhan bera ngaia, a dik a dawk pawh thlu tawh lo kan nih chuan min siamtu rilru nen chuan kan in persan hle dawn a ni.Thawmhnaw ropui leh changkâng ber ber neih te hi a hlu ngawt mai; mahse, heng thil hlu leh mawi te hi zawng thlanmuala kan la liamsan leh mai tur vek an ni. Thiamna hi a hlu a, chumi nei tura theih tâwp kan chhuah ṭhin pawh hi thil ṭha; kan tih ngei tur pawh niin a lang, Mahse, dam chhan theihnghilh phah nana kan hman erawh chuan thil pawi tak a ni lawi si.
Pathianin chhan neiin min siam a, chhan neia nung turin min damtir bawk a. Kan dam chhan tura a ruat chu eng dang ni lovin he leia a ram din hi a ni. He leia a ram din si lo va mahni sahmim tipuar tur ngawta kan damchhung ni hi kan vui liam a nih chuan dam chhan luah zo lo kan ni mai dawn a ni. Mahni ṭheuh in en fiah ila, kan hun liam tawhah mahni tan ngawta hun kan lo hmang ṭhin a nih pawhin kan dam chhan Pathian ram din turin kan hma hun lo kal tur hi hman i tum dawn teh ang.
0 comments:
Post a Comment