Hun rei tak aṭnga kan lo nghahhlel em em, Tlumtea thlir tak a kan lo thlir YMA Library building chu ni 10, November 2012 zingkar-ah hian hawn a ni dawn ta. Branch Committee-in min hawn sak tura kan beisei Mizoram State Librarian chu rokhawlhna avangin a thei leh dawn lo va, a hawngtu tur chu Branch Committee in midang ala ngaihtuah leh dawn niin thu kan dawng.
Kan sawi tawh ṭhin angin he building sakna tur sum hi RRLF(Raja Ram Mohan Roy Library Foundation) aṭanga hmuh a ni a, he kan sum hmuh bakah hian Bialtu MLA Pu Lal Thanzara pawhin a fund atangin pawisa eng emaw zat a rawn thawh ve bawk. He building sak a nih chhunga work supervisor-te inpekna leh ṭhahnemngaihna a fakawm hle a, mahni bungrua leh thil ṭul dang YMA tana lo pe ṭhin tu a bul hnaia cheng te pawh an fakawm hle a ni. YMA member hnatlanga thawk chhuak zawng zawng te pawh theihnghilh chi an ni lo. Vengchhung mipui te ṭhahnemngaihna leh thawhhona avang chauhin hetiang building ṭha tak mai hi kan lo nei thei ta a ni.
Kan veng pawhin hma kan sawn chho ve hret hret a, tun aṭanga rei vak lovah Hall-ṭha leh changtlung tak pawh kan la nei thei turah beisei ila a ṭha awm e. Heng ang hmasawnna kan hmuh ṭhin hi a lawmawm hle a, a enkawl leh venhim kawngah khawtlang hian mawh kan phur nasa hle dawn a ni. Mahni ta anga en nachang kan hriat loh chuan reilo te ah a hmelhem leh mai ang tih pawh thil hlauhawm tak a ni.
Library thar hawnna-ah hian veng chhung mipui a thei a piang kal turin kan in sawm a, kal ṭheuh pawh tum ta hlawm ila a lawmawm hle ang. Tunah hian Library bungrua pawh sawn thlak fel a ni tawh a, Library sub-committe lam pawh hnatlangin an buai hle. Hawn fel a nih hunah chuan hawh kher lo pawhin a hmunah a chhiar theih tawh dawn a, lehkhabu chhiar pawh taima deuh deuh turin kan han in sawm a ni.
0 comments:
Post a Comment