HRING NUN HI KA DAWN ṬHIN A

- Zotea Zote

   
    Hla siamtu chuan, "Hring nun hi ka dawn ṭhin a, hlimthla ianga ral mai tur; sum leh sanna kan um hi leia damna chhan tur em ni le” tiin a mawi leh nalh zet maiin a lo phuah chhuak a. He hla hian kan nun hman mek hi eng ang chiah nge a lo nih a sawi fiah tha hle mai. Kei a kar hian ka mawl leh fin loh ang ang hian hring nun hi ka suangtuah nasa ve hle ṭhin a, a chang chuan lungngaihna chirh dup a lo ni hawt a lawm le han tih chang te, duhamna leh in pawngnekna khawvel ni hiala ka hriat chang pawh a tam khawp mai. A ral leh lam kan thlir a, nu leh pa, u leh nau leh thenrual tha tak tak te nena
hlim taka kan khawsak ṭhinna te, thil ho tak tak pawh hlim taka kan nuih pui bawk bawk te kha hringnun chhiar tinuamtu a ni ve tho bawk si! Mi neih ang engmah nei lo chunga, chaw tui ti taka kan han ei buan buan ṭhin te tak hian nun a tinuam ṭhin. Ka hun kal tawh chu auh kir rual a ni tawh lo va, ka hma hun lo kal tur hi eng tiangin nge ka hman zel ang tiin ka suangtuahna chu a vak kual ruai a, hringnun chu hetiang hian hman tur a ni ti bik thei mah suh ila ka duhaisam ram erawh khawnge kan thai lang leh poh teh ang.

THIL ṬHA TIH: Thil ṭha tih hi ava har ṭhin tak em! Khawvel hmasawnna leh changkanna chi hrang hrang sual lama min pen mai tir thei thil te hi kan bul maiah a thahnem fu mai bawk si. Thil ṭha tih tuma kan hawi chhuah chang lahin mi aia ṭhing nih ka hlau ve khanglang vei rawl nen. Chutiang rêng rênga ka rilru ka hman lai chuan “thil ṭha tih i ning suh ang u, kan inthlahdah loh zawngin a hun takah kan seng dawn si a” tih Bible thu chang tawite chu alo lang zawk mai a. Bible zir mi ka nih loh mai bakah thlarau lam nunah ka lo pachhe ve leh zel bawk si a, chu chuan chu thu ṭha tak pawh chu a nihna angin min pawm tir thei lo hialin ka hria. Mahse, mawlmang takin ka ngaihtuah a, thil ṭha titu chuan thil ṭha he lei-ah leh lei piah lam ramah ala seng dawn tih ka hria. Chu chauh pawh chu tih vang vang nachhan tlinga ka hriat ve avangin hawh u, kan ngaihtuah vang vanga tha ber ni a kan hriat hian he hring nun hi hman i tum tlang teh ang u.

MIDANG TÂN FAR KHAT TAL: Malsawmna dawn hi a hlu a chutih rual chuan midang tana malsawmna thlentu nih chu thil harsa tak a ni. He thu ka ngaihtuah laia ka rilru a lo lang chu Mother Teressa a ni. He nu hi nu hmelṭha ber, lehkha thiam chung chuang leh nu hausa a nih kan hre lem lo. Nu tlawm tak, pian phungah pawh ani aia thlan tur hi veng kilkhawr berah pawh an ther fur awm a sin. A ni chuan a nihna leh khawsak lam a ngaihtuah lo va, tlawm takin a theihna zawng zawngin midang tan rawng a bawlsak mai ṭhin. Mi chanhai leh riangvai tan nu nih a tling a, a taksa he leiah awm tawh lo mah se; khawvel hian a hnathawh hi a theihnghilh ngai dawn lo a ni. Midang tana malsawmna thlen tur hian retheih leh nawmsak hi tehna atan a hman tlak lo va, miin a duh phawt chuan a ni thei a ni tih hi theihnghilh loh a tha hle mai. Khawvel ropuina leh mawina hi zawngin mi chuai hun a nei a, thih hnu pawha nun rengna erawh midang tana malsawmna farkhat tal nih ve hi a ni.

CHAN TAWKA LUNGAWI ZIR: Engpawh tawk ila ka lawm zel ang tih nun nei tluka mi awhawm hi sawi tur an vâng viâu awm a sin. Chutih lai chuan, lungawina leh lawmna reng reng nei lo mihring tluka mi khawngaihthlak hi an awm lo hial ta ve ang. Lungawi hlei thei lo bula awm hahthlak leh thawpik thlak zia te, mi hlim thei leh lawm em em ṭhin mi te ngaihawm zia leh an bula chen nawm zia te hi sawiin a siak lo ve. Keini ang tan hi zawng han lungawi zia a ni lo ve tiin i ngaihtuah thin em? I tawrh aia nasa tuar khan mi an lo lawm thin tho tih te hi dak chhuak la han thlir zau ta che. Engpawh i chungah thleng se ka tana khuanu ruat a ni tiin pawm thlap la, chutah chuan lungawina i hmu ve ṭhin ngei ang.