KAN THLENG LEH TA ṬEP E

-Lr Tochhawng

    Sahmulphah Thla kan lo tleng leh ta reng mai, mitin kan thinlung lamin Bethlehem a awn leh ta niin a hriat. Ṭhenkhatte phei chu Urlawk zan a hman dan tur ringawtin an buai leh chamchi ṭan tawhin a rinawm, nu leh pa tam tak tan pawh rilru hah Thla alo thleng leh ta ṭep mai zawng a nih hi maw..ṭhenkhatte tan lah, d^kna hun alo ni vei nen, chutih lai karin miṭhenkhatte tan erawh zawng hlim leh lawm tak a amah fak nan leh intih chakna hun thla alo ni ve leh si bawk nen. He hunpui Kristiante tan leh Kristian ni ve kher lote tan a, lo thleng tur hi nghakhlel takin Tlumtea thlirin ilo thlir phawt mai teh ang.



    Pawlkut Thla alo nih ve leh aṭanga kan lo nghahhlelh ve em em ringawt, Pawltlak thla chu kan lo thleng ve leh dawn ta reng mai zawng a nih hi maw....a ri ringawt pawh hian kan lung a kuai deuh hnâpin a rinawm. Engtiang chiahin nge kan hmuah  dawn a, he hun ropui leh hlu tak lo thleng tur hi kan hman dawn tih hi kan inzawt ve ngai meuh em le ? Ti ve leh khanglang ila, kan la naupan ve laite kha chuan, kum khat chhung hi rei kan ti ngawih ngawih a, kan nghakhlel lutuk khan kum sawm vel ni mai  hian kan hre ṭhinin kan hre ṭhin, mahni duhzawng leh it zawng zawngte, thawmhnaw thar neih nante kan hmang a, a hmel hlui hlauvin a infun ṭhasa pawh kan phelh darh ngam ṭha ngailo ṭhin a ni. Tichuan Krismas leh Kumthar chu alo thleng ta cheng a, a hlimawmna lai leh kan hman chhan pawh hre lek lovin kan lo pawngpaw hlim ve leh ringawt a, reilote chhungin chu hun chu kan hmangral leh chu a ni leh ta der si. Engpawh chu nise, a hlimawm bawk aniang, nu leh pa tam takte pawh hian Krismas leh Kumthar an hman dan hi sawi nuam an ti ve châwk ṭhin reng a ni.

    Chuti ang chuan nula tlangval, nu leh pa, pitar putar thlengin kan nghakhlelin kan hmang ṭhin a, kan hman dan leh nuam kan tih dan chu kan hun tawn zel a zirin a danglam ve mai zawk a ni. Kan ngaihtuah chiang ngai em ka hre chiah lo a, tunlaiah chuan naupang, nu leh pa, pitar putarte aichuan nula leh tlangvalah hian atla na sawt hle niin ka hria, tam takte erawh hi chuan kan hman chhan pawh kan hremeuh tawh lovin a hriat a, Kristiante tana a hlut zual bik em emna chhan pawh hre lovin, thil thleng ve pakhat huau huau nan kan hmang liam ta mai niin a hriat ta. lo ngai reng rawh Sahmulphah Thla alo thleng chiah anga, nula tlangval ṭhalai tam tak chu “Urlawk Zan” leh ‘Kumhluithlah Zan’ hman dan tur ringawt a, buai tawk fe fe chu kan tam lehin a rinawm.

    Ṭhenkhatte lah chu ngaihzawngte nen a hman hman loh hlauvin, chhass neih tur zawngin anvir buai chung anga, ṭhenkhatte ve erawh chu tlaivar zan a Ar kanna tur zawngin an vir buai ve leh ta ang. Tum ai hmain a hun alo thleng leh lawi si anga, ṭhenkhatte chu kan hman chhan pawh hre lek lovin, a chahthlak san leh lawi si ang a. aṭhente erawh chu abiling abalangin an hman leh a rinawm. Nula leh Tlangval inngaizawngte tan lah hun ṭha a inher a nih hi ti tawk lah bo lovin, naupang ho dawh thlak zanah nula ho lah in, ahnua inchhirna tur dâwn sêng tawh lêk lovin dawhthlak an lo dawhthla ve leh ringawt ang a, kumthar lamah Daktawr ho an buai leh hlein a rinawm. Tlangval ṭhalaite lahin ruihtheihthil an hmuh tawh phawt chu tih ve na remchangah anlo hmang ve ṭhin bawk nen, a hnuah inchhirnain an khat leh ṭhin tho si a. Miin “I hmang nuam em?”, an tih hunah kan hmang ṭha khawp mai kan ti leh vek tho awm si a. Hetiang tehnuai hi Krismas leh Kumthar kan hman dan anih si chuan Siamtu Pathian hi alawm tak meuh angem le? Heti ang hi mi Krismas leh Kumthar hman dan tur chu ni ang le? Ngaihtuah ava ti thui tak em?

    Aw...nu leh pate u...kan tu leh fate hian he hunpui an hman dan hi kan va hrelo thei tak em!!! Kan tu leh fate fel leh ṭha a kan hriat lai hian kan hriat loh phenah hian nunkawng anlo va dai sual nasa tehreng em..Kan inbihchian deuh chu a hun ta hle mai. Nakin a rilru hreawm tak a, kan awmlohna tur hian tun aṭang hian kan tu leh fate hi kan lo buatsaih lawk ava ngai tehlul em.. Heng kan tu leh fate hi nakin lawk a Kohhran leh ram hruaitute an la ni mai dawn si a, chutiang hun alo thlen hunah chuan kan tuar zo lo hian kan la mang vek ang tih pawh ka hlau hlel love. Pa ber pawhin he hunah hian chhungkaw in uaplum nan hmang ta se, nu ber pawhin aphawkvuakvet mai mai a intlak ral lovin, pasal fanaute inchhungluma duat nan hmang ta se ava ṭha dawn em....Nula tlangvalte pawhin tih tur kan nei ve tih hriain, kohhran thil tihnaah lo chuan tel tum lo bawk ila, Amah kan belh tlat chuan humsual kan dai lovang tih a rinawm.

    He Krismas leh Kumthar lo thleng tur hi, nakin thleng a, kan hman dan sawi zui tlak leh kan ti ti tui ber a nih fo theih nan Siamtu Pathian hrerengin Amah nen i hmang ang u.

KRISMAS LEH KUMTHAR CHIABAI LE.....