Vengchhung Aw

@. Vengdang te han en hian kan veng inrelbawl dan hi a lungawi thlak mawlh loh, hei aia chak zawk leh hmasawn deuh zawk chuan hmalak dan hi a awm mawle. Hruai ṭhat theih loh chuan hruaitu pawh nihloh ngam mai tur. Miin min thlang alawm tih vang ngawt a nihna hi rula-rawneih mai mai loh tur.
- Pawngvina

@ A ṭul huna nam ve phêt phêt thei reng, nihna chapo puia mi hnuaichhiah ching kan nih chhung chuan engtikah mah kan veng hian hma a sawn thei ngai lovang.                     - Buaibuta

@  Kan  thil vei leh sawi duh zawngte, kan khawsak dan leh mizia a hniam lutuk hian veng inlungrual lohna kawngah bu nghet takin a khuar mek zel zawng a nih hi. In enfiah vat kan ngai hle mai.       - Habakuka

Read More

TUALCHHUNG

Damlo
*  Lalrinsangi (Sangtei) W/o. Lalhmunsiama, K-Sec chu ni 6.11.2012 (Thawhlehni) khan Civil Hospital ah a chhul bawk paih a ni a, tunah inlam ah enkawl mek a ni.

Lehkha Kawng Bo
*  Lalramzauvi, Hunthar    ( Cheque Bu )
*  Lalhrinmawii, Hunthar
( SBI )
Vaivakawn Post Office-ah lam theih a ni.

Library Hawn Hun Sawn
Engemaw rawlkhawlhna avangin ni 10th November, 2012-a hawn tura tih chu remchan zwkna avangin ni 17th November, 2012 (zingkar) ah hawn tur a ruahman a ni.

Editor Zin Lo Haw
Kan Editor Tv Zohmingthanga Zote chu MZP General Assembly, East Lungdar a neihah a kal a, ni 9 November, 2012 (Zirtawpni ) khan tluang takin a lo thleng.

Hnatlang Nei
Hunthar Branch YMA Kuang Sub-Committee te chuan ni 10th November, 2012-(Inrinni) nileng khan kuang siam hnatlang an nei.

Kawr Siam
Tunlai hian Local Council hmalakna in Fire peng lei thlang kawr chu siam mek a ni a, tun atanga reilote ah an zawh theih beisei a ni.

Read More

OBAMA AGAIN

-Lalhmangaiha Renthlei

    Vote thlak lai mek a ni a, President nihtum pahnih chu, daihzai taka hun hman tumin, an thlawk pur pur a. Obama chu, Chicago khaw daia, an party office ah sawi lawk hauh lovin, a thleng hlawl mai a. An lo lawm hle. He hmun aṭang hian Mobile phone- in mite chu Vote turin a sawm a, a va phone khan an lo hre mai lo, Obama, US President ka nia, te a han ti leh rih a. A bula mite an lo nui ham ham.

An Intlar Thui : Keini vote thlak tur zawng ni ila, kan phun nasa viau ang. Darkar 3, darkar 4 te an intlar pet put a. President thlan rual hian Congress member thlangte an awm a, hmun ṭhenkhatah chuan an ballot paper pawh phek 9 ngawt, ṭawng chi 3 a ziahte a ni a, Vote thlakna pindanah pawh minute 20 chuang te an awm a ngai ṭhin.

Read More

Hunthar Branch Y.M.A Committee

Hunthar Branch Y.M.A Committee
Vawi 191-na neih a ni
December ni 28-ah kum 2013 branch hruaitu thlang dawn

Hunthar branch Y.M.A executive Committee vawi 191-na chu ni 8.12.2012 (Ninga Zan) khan Pu A. Ramchhuanawma in ah neih a ni a, he hunah hian kum 2013 branch Y.M.A hruaitu thlan dan tur ruahmanna an siam a, remchang zawkna avangin Library hawn hun sawn a ni bawk.
Thurel tlangpuite :
1. Library hawn chung chang :
    Y.M.A library hawn hun atana ni 10.11.2012 ruat chu remchan zawkna avangin ni 17.11.2012 (Inrinni zingkar) ah sawn a ni a, hemi hunah hian Vengchhunga NGO leh Local Council-te chu tel tura beisei an ni a, sawm tum an ni bawk.
    Library hawn hunah hian a hmunhma lo ruahman tur leh refreshment buaipui turin Library Sub - Committee ruat an ni.

2. Kum 2013 Branch hruaitu thlan dan tur chung chang :
    Kum 2013 branch Y.M.A hruaitu thlan hun atan december ni 28, 2012 chu ruat a ni a, Y.M.A hruaitu thlan hi post by post a neih a ni ang. Hemi zan hian section hrang hrang hruaitu tur thlan nghal a ni dawm bawk a ni.
    2013 Branch Y.M.A hruaitu thlan atan hian Nominate mi 12 branch executive chuan a nei a, floor aṭangin mi 3 nominate theih a ni bawk ang. Branch Executive-in a hruaitu thlan tur atana a nominate-te chu heng mite hi an ni :

1. Pu A. Ranchhuanawma
2. Pu T. Ramzauva
3. Pu K. Lalrinmawia
4. Pu Kapliana
5. Pu Malsawmkima
6. Pu Lalbuatsaiha
7. Pu Rohmingthanga
8. Pu Hmingthansanga
9. Pu K. Lalroseia
10. Pu V. Lalramtiama
11. Tv. V.L. Malsawma Renthlei
12. Tv. C. Lalmalsawma

    Branch finance Secretary ṭang lai Pu Zabiakthara chu hna thil avanga tranfer anih avangin nomination-ah telh a ni lo.

3. Khawhar chhungte ni hman chungchang:
    Khawhar chhungte ni hman nise tih a ni a, hemi chung changa kaihhruaina leh a hun te lo ruahman turin Thlanmual Sub - Committee ruat an ni.
4. Faina hnatlang chungchang :
    Hun remchang hmasaah faina hnatlang neih tum a ni.

5. Vengchhunga hnamdang sumdawng chung chang :
    Vengchhunga hnamdang sumdawngte November thla thleng hun a pek chu en zui nise tiin a rel a, hemi bawkzui leh a ṭul anga hma la turin December ni 1, 2012 zingkarah hnatlang neih a ni ang.
6. Halpuah leh silai lem chungchang :
    Kristmas leh Kumthar vuakvetah Halpuah leh halmawi lam vengchhungah zawrh, hal khap tlat a ni a, vengchhung mite tumah ti lui lo turin Branch Y.M.A chuan a ngen tak meuh a ni.
    Silai lem hi naupang tam tak tem an hmang ṭha lo ṭhin a, rualbanlohna thlengin a thlen thei a ni. chuvang chuan nu leh pa ten kan fate lei sak lo hram turin kan in ngen bawk e. Heng thil khap pahnih hi ti lui kan awm anih chuan a ṭul angin Branch Y.M.A chuan  hma a la dawn a ni.
7. Death registration chung chang :
    Chhiat tawk kan awm reng reng chuan kan chhungte thihni aṭanga ni 21 ral hma ngeiin Death registrar Pi Lalbiaknungi hnenah in report a, death certificate lakchhuak ṭhin tur a ni.

Read More

Hunpui Kan Thleng leh Dawn ta

    He  khawvel eng hmu tura rawn ṭap chhuak bâi bâi ve tawh phawt Zo-fate zingah chuan he hun hian kan hring nunah ṭuan leh mang ata tawh phat rual lovin kan thinlungah nghet takin bu a khuar ṭheuh awm e. Mitin in erawh kan tum dan leh ngaihruat angin kan hmang thei chiah lo a ni mai thei; amaherawh chu, he hun kher hi chuan minawlpui te min deh dan chu hun dang anglo takin, tunlai tawng takin kan pâr chhak loh pawhin kan chuai râi zel zawng a nih tâk ṭhin hi maw.
    Mahni duhdan leh nuam tihzawng ang pawh a hmang ve thei lo an kat nuk lai a, ṭhenkhat Siamtu beisei leh duhdan ang pawh hmanglo an ther ferfur mai te, perhpawng chirî pawh tluk lova lo chiri ve ta biah biah  hmuh tur awm te,neinung deuh te tan men raza hun leh nei ve lemlo te tan pawh men razu hun, chawlhni tuk a sa hmeh leh hmeh loh chung chang khel thama nei chhungkua te tan pawh hmuihmer hne khawp a chet lak hun an inherchhuah dan aṭang hian, he hun zet hi zawng hun danglam anih zia a hril chiang hle awm e.

    A tawp berah chuan ka unau duhtak, he hunpui lo thleng tur atan hian hun chhinchhiah tlak leh chhuanawm i neih theih nan hna thawk la, sulhnu chhui apianga ṭahna thlentu i hnutchhiah loh nan; fimkhur takin he hunpui lo thleng tur atân hian inbuatsaih rawh le.  

Read More

DAWN TISEI

    Mahni hnam tih dan leh kalphung hnual suata hnam dang te tih dan la a, deusawh leh diriam taka mahni hnam hnuai chhiah ṭhin ṭhangthar te hian in ennawn kan mamawh tak zet a ni. Mahni rama kan thawh zah leh ngam loh pawh mi ramah chuan mawng vawmba tih ang deuhin kan kat dawr dawr a; Abdula leh Dul lem lova te’n kan inngaihtuah chhung hian kan thawh tur zawng zawng an thawk zo mai dawn! Lehkha thiam ten hna thawh tur an hmuh lohna ramah hian thiamve lemlo Burma Mawia te chuan an thawk seng mawlh si lo. Ka unau..Obama aia i bam bikna engmah a awm chuang lo. 

    Rualbanlote meuh pawhin pawl tân chuan tiin sawrkar lakah nuar an chhuah ngamna Zoramah hian Zo-fate’n kan nun hman dan hi “A VA MAK EM ”
           
                - HC. Rodinmawia

Read More

KAN THLENG LEH TA ṬEP E

-Lr Tochhawng

    Sahmulphah Thla kan lo tleng leh ta reng mai, mitin kan thinlung lamin Bethlehem a awn leh ta niin a hriat. Ṭhenkhatte phei chu Urlawk zan a hman dan tur ringawtin an buai leh chamchi ṭan tawhin a rinawm, nu leh pa tam tak tan pawh rilru hah Thla alo thleng leh ta ṭep mai zawng a nih hi maw..ṭhenkhatte tan lah, d^kna hun alo ni vei nen, chutih lai karin miṭhenkhatte tan erawh zawng hlim leh lawm tak a amah fak nan leh intih chakna hun thla alo ni ve leh si bawk nen. He hunpui Kristiante tan leh Kristian ni ve kher lote tan a, lo thleng tur hi nghakhlel takin Tlumtea thlirin ilo thlir phawt mai teh ang.

Read More