SUNDAY ZING LEH KAN CHHUNGKUA!

-Zomama

Mizote Kristian kan nih hnulama Sunday zing pawimawh tak zia leh chhungkua kan buai ṭhin si zia hi thilmak zinga chhiar tel tlak em chu nilo mahse ngaituah ti tam tu chu a ni ve chiang mai! Chhungkaw chhangchhe ber aṭanga a hulhar ber thlengin kan buai? Ni e, keini chhungkaw tân pawh hian hnathawh chawlhni a nih rualin kan chawlh lohni ber ni zawk te hian ka hria? Sunday zing buai hi Saturday (Inrinni) tlai aṭangin a inmung tana, Sunday zing chawhmeh buaipuiin chhungkaw pa ber vawksa tha zawngin, chhungkaw nuberte duh ang lei loh hlauvin kan vei vut vut mai a nih hi maw! Chumai a la ni lo, fate thawhlawm thawhtur ti nawia patlingin pawisa nawi kan zawn tak ruk ruk zing awm chhun a ni hial lo maw?

KEINI PAWH
Mi chhia tih takah keini chhung hi Sunday zing  thawhhma thiam lo tak mai kan ni. Chawlhni a ni dawn tih hre ran in Inrinni zan kan han meng chiam phawt a, eng phei chu kan men chhuah lem law. Chawkawri leh Code red serial en hian zan dar 10 hi kan thleng ziah mai. Nu berin  Remote controll hum paha kuhva a thial biah biah tawh chuan kan chhungkuain kan tang tih sawi ngailova hriatsa a ni. Pa berin  Mobile phone khawih nuap nuap paha nu ber a backup that chuan fate tan chuan thlamuang taka men chiam a ni tawh mai.

KAN FATE
Te bera aṭanga lian ber thleng hian zan men thei viau e tilo chuan zing thawhhma hi kan thei phian lawi a! Zing dar ruk vel atanga sunday thawmhnaw lo inbel ta ap mai te, ‘tukin zing chu ka tawngtai hun’ lo ti ngat ngat tawk te kan awm hi vanneihna nge vanduaina ni dawn ni? zing thawhhlim atangin nu berin  fate zun leh ek thianin zingthawh bul an tan a,  fate zun leh ek then paha nuberin eirawng a bawl hi a tui duh bik ni maw! Chutih laiin thenkhat an lo invel tap! naupang tap na na chu hnap tlak per pur chang an lo nei a, chawi barna lam ngeia nu berin naupang hnap ansawk hlawih mai ruala a pawnfen hman thiamah an tat fai ang nawk nawk  te hi a hrisel a ni chek ang kan chhungkua hian kan la damloh phah lo tlat! 

Chhung inkhawm mawlh mai hi ni buaithlak thin, inti thupui fun takin pa ber kan ding chhuak a, dinchhuah rualin ‘tumah Bible chhiar laiin bengchhen loh tur’ sawi zawh rual rualin “ A pa min pawm” pakhatin a lo ti, naupawm chunga Bible chhiarte hi tihthan zu awm hek lova! Tunah Lalbiakna kan sawi ang tih pahin kan han ding kual thap a’ Kan Pa..’ dawhkan a ri bur.. naupang tap in a zui tak chiam tum te hi a va tam tak em!

A NEUH NEUH
Sunday zing zet hi zawng Pa berin wallet kan en tak chiam chiam leh kekawr mawng ipte kan dap zin ber zing te hi a ni ta ve ang! thawhlawm khawn lo lut lo bihruksan daih chak changte hi zu awm a mawle! Thawhlawm khawn chu sawiloh Hunthar Aw man leh Horeb man khawn lo inzui lut thin te  mai mai pawh hi lo hmuh loh der chang a awm hian kan chhungkaw dinhmun chu a ti chiang awm e a...

BUAINA RALLIAN
Sunday zing kan chhungkuain kan tuarna ber leh kan hlawkpuina ber chu nuber anhla fate nena kan ngaithlarual thei hi a ni awm e a. zing thawhlim atanga Biakin bathlar kan rahruala a tawp thei hram hi kan chhungkua chuan ngaiah kan neih deuh der mai. Biakin-a mutthluk te hi Pa ber hna nite hian ka hre deuh tlat tawh mai! mutthluk tui laia fate ninhleiin min han beng harh leh pawp thin te hi mumangfuh deuh neih chang phei chuan huat awm rum rum thei nia.

Sunday School thuzir hre reng reng loa kan thut tluan parh theih hi chuan ngaih that tur nge ngaih that loh tur hriat thiam har tak a ni. Sunday School kan han banga, thut rual puite leh thenawmte lirtheia an tlan haw sung sung laia nupuite bag leh a chhunga sahdah leh kuhva zen ruk ruk chunga nupuite kan zui haw ve thei te hi tupa thiamthil nei ang emaw te pawh kan ang awm hi ka tia....