Ram leh Khawtlang vei rau rau hi kan vei dan a inchen hlawm awm lo mang e tih hi ka ngaihtuah ve fo mai. A veitu kan ṭhathnem ang ai hian kan vei chhuah leh a rah kan hmuh hi chuan lung a tiawi zo mawlh lo. Kan politician tam ber hi engvangin nge politics hi i luhchilh tiin zawt ila, an chhanna tam ber tura ka rin chu ram hmangaihna avanga politics luhchilha insawi hi an ṭhathnem ber ka lo ral rin ve ngawt a. NGO hrang hranga inhmang pawh hi eng vanga hetianga inhmang nge an nih tiin zawt ila, ram leh khawtlang an hmangaih vang a hetianga inhmang an nih thu hi an sawi tam ber a nih hi ka ringhlel hauh lo. Ram leh khawtlang hmangaihtu hi vengtinah kan ṭhahnem viau a, a ram pum huap phei chuan kan ṭhahnem hle a ni tih hi phat rual a ni lo.
Chutiang taka ram leh khawtlang hmangaihtu kan tam chuan kan ram chu ram nuam tak, hmasawnna pawh thu mai ni lova a zuana zuang awk awk tur chu a ni phawt mai. Mahse chutiang chu a tak ramah hmuh tur a awm hlei thei tlat si lo hi ka vei tak em em chu a ni. Ram hmangaitu tak tak, mahni pumpui aia ram dah pawimawh hi khawvar lam arsi ang pharh kan ni mai em ni tih hi ka ngaihtuahna luahtu chu a ni. He ram leh khawtlang hian tawngka maia hmangaihtu aiin a taka hmangaihtu a mamawh a, sawi thiam leh sawi tha aiin a taka a hmangaihna lantir thin mi a mamawh tih hi ka thu rolum a ni. Mizoram tluka a ram mipui zat anga chhuta rawngbawltu tamna hi ram danga hian an awm ka ring lo hial mai. Rawngbawltu tha tak anga kohhran bela Bilble nena kan in fam mek lai hian, kan bul maia khawsa kan thenawmte mai pawh hian ringtu tha hmuha min hmu hlei theih loh chang hi a thahnem fu thei tlat mai. Politician kan hmuh dan leh kan thlir dan mawlh hian kan nihna hi a hai lang chiang em aw ka ti thin. Mi politics-a a inhman deuh chuan dawt pawh mam taka sawi thiam leh dik lo deuha khawsak pawh hreh mang lo tura ngaihna mipui nawlpuiin kan nei ta te hi ngaihtuah thui ngai tak a ni. Ram hruaitu ropui tak tak te chanchin hi a hre tam ber ka ni hauh lo chungin an ropuina thuruk ni thin tlat chu mahni aia ram an hmangaihna leh ram leh hnam tana an inpekna hi khawvelin a theihnghilh theih loh chu a ni. India hnam pa Mahatma Gandhi khan in leh lo ropui tak leh sum leh pai thahnem tak a neih an sawi ka hre ngai lova, he ram leh hnam tana a ngaihtuahna zawng zawng a hmanna erawh kha chu hahipin kan sawi thin chu a nih hi.
Mi pawisawi hlau reng reng nih ngawt te hi mi ṭha ziktluakah ka ngai thei lo fova, mi ṭha ngawi reng nih ngawt hi a hlutna ka hmu thiam lo fo bawk. Vote zawng politics vel tuipui tawk politician te hian he ram tan thil ropui tak an tih hi ka beisei ngam lo a, thil ṭha a nih chuan huai taka hmala ṭhin; a ṭul phawt chuan tlak pawh pawisa lo politician hi he ram leh khawtlang hian a mamawh ber a nih loh pawhin a mamawh ber te zinga mi chu a ni ngei ang. Ther hlo um reng renga nun hman te hi he ram leh khawtlang ṭhanmawh bawk a ni a, chutiang mi pawh hmusit ngam lo khawpa rilru pachhia kan ṭhahnem deuh lutuk ta em aw? Sum ngah hi ropui tehna buklung atana kan hman chhung chuan ropui tak tak hmuh tik ni hi kan nei ngai lovang tih hi a hlauhawm hle. Kristian kan nihna kan chhuan viau lai hian kan nun danah erawh kristianna hian hmun laili a chang tlem hle mai. Kan insak dan te, vantlang ram kan LSC pawhin a huam reng reng loh mahni ta anga cheibawl hmiah hmiah kristian kan thathnem chhung chuan kan ram hian hmasawnna rahbi a rap thelh pheng phung dawn tih hi thil chiang tak a ni.
Thawhrimna tel lo nawmsakna kan thlahlel a, hna thawhkawr hak zak tawk lekin kan changkang a, kohhrana inhman chu mi pangngai nihna ang chauha kan chhuah mek bawk a. Kan sum lakluh ngaihtuah miah lovin incheina man to ber ber kan inbel a, thil changkang leh chhuak thar ber ber neih hmasak inchuhin kan hmanhlel bawk a. Tlawmngaihna leh Zonun mawi kan inchhuanna ṭhin te pawh sirah kan hnawl mek bawk si. Tlaivar thei lo khawpa hrisel lo nula tlangval kan thahnem telh telh a, mut hun leh thawh hun pawh nei mumal lo ṭhalai chu phungvelh an sawi ang maiin kan pung tual tual mai bawk. Hetiang hi kan nih dan tur a ni lo tih hi kan pawma kan harh thar a ni loh chuan he ram leh khawtlang hmakhua hi ngaihtuah thui poh leh a thim ni a hriat chang ka nei fo mai. Khua a tlai hma hian harh thei lo khawpa mu nghet mai lovin kan ram leh hnam tan hian ke i pen ang u. Nang leh kei hian bul kan ṭan chu kan tihmakmawh kan kova tla a ni e.
0 comments:
Post a Comment