ṬUAN ṬUL VANGIN

- Zotea Zote

   Ṭhangkhat vel liam ta a ka thil tawn ngaihnawm loh pui pui kha tunṭum chu i’n sawi thar leh mai mai teh ang. Thingtlang naupang, kum li dan vela vanneih hlauha Aizawl hmu ve thei hram; a chang phei chuan ṭah leh nuar fawm a Aizawl kal ngen chhuah a ngaih châng te kha hmanlai an chang mai dawn chu a nih hi! Vanapa Hall ban uluk taka kan kuah lai leh haw hnu a ṭhiante bula intithei taka han sawi nawm zia te kha aw! Thing delhloh lung delhloh nafam chu kan lo ṭhanglian ve zel a, harsatna lian tham tawk lovin zirna pawh kan chhunzawm ve bek bek kha a ni a. Mahni in lum aṭanga High School kal theih ve na na na chu chhungte’n hnathawkah min it viau mahse Fail hauh lo han inchawlh tir ngawt hrehna avangin High School chu kan chhunzawm veleh hram kha a nia.

    Pawl sawm han passed meuh chuan nu leh pa rilru a buai ta map mai. Min lawmpuitute hlim taka hmachhawn chungin a phenah rilru hahna namen lovin a tlakbuak nghal tih kha lungfing tawh tân chuan hai rual a ni lo. Nu leh pa zan mu inhnial, ‘kan zir chhunzawm tir ang nge kan chawlhtir tawh mai ang’ tih agenda har tak kha keimah vang a ni tih ka hre ve reng mai bawk si. Hlawhtlinna ka chan hi kan chhungkaw tân chuan malsawmna aiin anchhia a ni hawt mai tih ngaihtuahna pawh min siam rum rum mai. Aizawla awm tur chuan ka inbuatsaih a, zankhat riak vela Aizawl a bazar nen chuan a boruak a inthlau hle mai. Nu leh pa leh chhungte hmuh phak lohva awm chu kei a buan atan chuan thil awlai a ni lo. Mahni mamawh thawmhnaw bag puar tlat khawp a ka han ah fel chuan Aizawl ka pan dawn ta tak tak tih chu hai rual a ni lo. Kawtkaia ka nun min thlah a min mangṭha lai khan ka hawi let ngam lova, ka mittui a tla hial a ni. Kan khua kha khaw ropui leh hlu a ni lo, mahse ka pianna a nih miau avangin ka tan a nep thei lo. 

    Tuan ṭul vangin kan vang khawpui chu rualelna avangin ka chhuahsan a, harsatna, mangan leh retheih engpawh huamin Zawl khawpui lai chhuat chhirin ka hun leh ni chu ka lo chhiar ve ṭan ta. Siamtu hian ka tan rem fel tak a ruat a, khawngaihtu leh hmangaihtu ka thlen chin apiangah min pe zel a. Aizawla mikhual ṭi dûk tura a ka inngaihna chu chhem bo ang hlauh a ni ta hial mai. Ka felloh ang anga min lo kuangkuah ṭhin chhungkhat laina leh ṭhenrual ṭha ka nei te hi an hlutna keia ṭawngka hian a sawifiah ngut lovang.

    Loh theih loh avanga Zawl khawpui ka lut kha tunah chuan châm hlen tum ang hrimin nitin hunbi ka chhiar a, khawpui mi vengva zawk leh tling zawkte kaihhruana avagin thingtlang tlangval kha ka khawpui mi awm ve ta hmiah hmiah mai. Ka phu hauh loh chanvo hrang hrang ka vawn ve tak zozai te hi kei thingtlangpa tân chuan awih harsa khawpa tam a lo ni ve ta reng mai...